Ցիոլկովսկին մանկական տարիքում գրեթե ամբողջովին կորցրել է լսողությունը և 14 տարեկանից զբաղվել է ինքնակրթությամբ: 1879 թ-ին էքստեռն քննություններ է հանձնել ուսուցչի կոչման համար և ողջ կյանքում դասավանդել ֆիզիկա ու մաթեմատիկա (1892 թ-ից՝ Կալուգայում): Ցիոլկովսկու հիմնական աշխատանքները կապված են 4 մեծ հիմնախնդիրների՝ ամբողջամետաղե դիրիժաբլի, շրջահոսելի սավառնակի, օդաբարձիկով գնացքի, միջմոլորակային ճանապարհորդությունների համար նախատեսված հրթիռի ստեղծման հետ: Ցիոլկովսկին հետևողականորեն զբաղվել է ռեակտիվ սարքերի շարժման տեսությամբ և առաջարկել է հեռավոր գործողության ու միջմոլորակային ճանապարհորդությունների հրթիռների մի շարք սխեմաներ: Ցիոլկովսկին առաջինն է ապացուցել մթնոլորտ չունեցող մոլորակի մակերևույթի վրա տիեզերական սարքի վայրէջքի հնարավորությունը: Նա մշակել է բազմաստիճան հրթիռի տեսությունը, առաջինը լուծել ձգողության անհամասեռ դաշտում հրթիռի շարժման խնդիրը և դիտարկել մթնոլորտի ազդեցությունը հրթիռի թռիչքի վրա, հաշվարկել է Երկրի օդային թաղանթի դիմադրության ուժերը հաղթահարելու համար վառելիքի անհրաժեշտ պաշարների չափը, տվել հրթիռների և հեղուկահրթիռային շարժիչների կառուցվածքների մի շարք կարևոր ճարտարագիտական լուծումներ: Ցիոլկովսկու աշխատությունները մեծապես նպաստել են Խորհրդային Միությունում և այլ երկրներում հրթիռային ու տիեզերական տեխնիկայի զարգացմանը: Ռուսաստանի գիտությունների ակադեմիայում սահմանված է Կ. Ցիոլկովսկու անվան ոսկե մեդալ: Կալուգայում և Մոսկվայում կանգնեցվել են գիտնականի հուշարձանները, Կալուգայում բացվել է նաև տուն-թանգարան: Նրա անունով է կոչվում Լուսնի խառնարաններից մեկը:
| 
