Ցորնուկը (ցորենի խոտ, փըստփստուկ) դաշտավլուկազգիների ընտանիքի միամյա, հազվադեպ երկամյա և բազմամյա խոտաբույս է: Հայտնի է ցորնուկի շուրջ 100, ՀՀ-ում՝ 14 տեսակ՝ Դանթոնի, խայտաբղետ, ճապոնական, հուրանավոր, Բիբերշտեյնի և այլն: Տարածված է գրեթե բոլոր մարզերում: Աճում է խճոտ, քարքարոտ, չոր վայրերում, խոտածածկ թեքություններում, պարապուտներում, գետափերին, այգիներում, բնակավայրերում: Ցողունի բարձրությունը 10–80 (երբեմն՝ 100) սմ է: Տերևները գծաձև են, թավոտ կամ մերկ: Ծաղկաբույլը ցրված կամ հոծ հուրան է՝ 10–20 հասկիկներով: Ծաղկում է ապրիլից մինչև օգոստոս: Պտուղը սերմիկ է: Ցորնուկի բոլոր տեսակները վաղ գարնանային արոտների միակ կերաբույսերն են: Որոշ տեսակների բուսուտները ջրառատ տարիներին կամ թեթևակի ջրարբիացումից հետո կարելի է օգտագործել որպես խոտհարքներ:
|
