Ֆիջին պետություն է համանուն կղզեխմբում՝ Խաղաղ օվկիանոսի հարավ-արևմուտքում, Օվկիանիայի կենտրոնական մասում: Բրիտանական համագործակցության անդամ է:
Ֆիջի կղզեխումբը կազմված է ավելի քան 3 հզ. կղզիներից: Խոշորներն են Վիտի Լևուն և Վանուա Լևուն: Կղզիների մակերևույթը լեռնային է, ծովափերին կան նեղ դաշտավայրեր: Ափերը կտրտված են՝ շրջապատված բուստային խութերով: Կլիման խոնավ արևադարձային օվկիանոսային է: Գետերը (Ռևա, Վաինիմբուկա) կարճ են ու ջրառատ: Տարածված են խոնավ հասարակածային անտառները, տեղ-տեղ՝ մարդու միջամտությամբ առաջացած սավաննաները: Կղզիները հայտնաբերել են Ա. Թասմանը (1643 թ-ին) և Ջ. Կուկը (1774 թ-ին): 1874 թ-ին կղզիները գրավել են անգլիացիները՝ հայտարարելով այն իրենց գաղութը: Երկիրն անկախություն է ձեռք բերել 1970 թ-ի հոկտեմբերի 10-ին:
Հիմնական բնակիչները հնդիկներն ու ֆիջիցիներն են:
Ֆիջին գյուղատնտեսական երկիր է. մշակում են շաքարեղեգ, սորգո, կակաո, ծխախոտ, կոկոսյան արմավենի: Գործում են փայտամշակման, ցեմենտի արտադրության ձեռնարկություններ: Արդյունահանում են ոսկի:
