Գեորգի Ժուկովը խորհրդային զորահրամանատար է, ռազմական գործիչ, Խորհրդային Միության մարշալ (1943 թ.), Խորհրդային Միության քառակի հերոս (1939, 1944, 1945, 1956 թթ.), Մոնղոլական Ժողովրդական Հանրապետության հերոս (1969 թ.):
Գեորգի Ժուկովը մասնակցել է Առաջին համաշխարհային պատերազմին (1914–18 թթ.): 1918 թ-ից ծառայել է Կարմիր բանակում, Ռուսաստանի քաղաքացիական պատերազմի (1918– 1920 թթ.) ժամանակ եղել է էսկադրոնի հրամանատար: 1930 թ-ին ավարտել է հեծելազորի բարձրագույն հրամկազմի կատարելագործման դասընթացները, ապա վարել է հրամանատարական բարձր պաշտոններ: 1939 թ-ին ղեկավարել է Խալխին Գոլ գետի շրջան ներխուժած ճապոնական զորքերի դեմ ռազմական գործողությունը և ջախջախել նրանց, որ մտադիր էին զավթել Մոնղոլական Ժողովրդական Հանրապետության արևելյան մասը: 1940 թ-ից Կիևի հատուկ ռազմական օկրուգի հրամանատարն էր: Ժուկովը մեծ ներդրում ունի Հայրենական մեծ պատերազմում (1941–45 թթ.): Գլխավորել է մի շարք ռազմաճակատների (Պահեստային, Լենինգրադյան, Արևմտյան) գործողությունները: 1942 թ-ին նշանակվել է ԽՍՀՄ պաշտպանության ժողկոմի և գերագույն գլխավոր հրամանատարի տեղակալ: Համակարգել է ռազմաճակատների գործողությունները Ստալինգրադի ճակատամարտում (1942 թ.), Լենինգրադի շրջափակումը ճեղքելիս (1943 թ.), Կուրսկի ճակատամարտում (1943 թ.): Աջափնյա Ուկրաինան ազատագրելիս (1944 թ.) Առաջին ուկրաինական ռազմաճակատի հրամանատարն էր: Միավորել է Առաջին և Երկրորդ բելոռուսական ռազմաճակատների գործողությունները Բելոռուսիայի ազատագրման ժամանակ: 1944–45 թթ-ին ղեկավարել է Առաջին բելոռուսական ռազմաճակատը, որի զորքերը Առաջին ուկրաինական և Երկրորդ բելոռուսական ռազմաճակատների զորքերի հետ իրականացրել են Վիսլա–Օդերի ռազմագործողությունը, ապա ջախջախել թշնամու բեռլինյան խմբավորումը և գրավել Բեռլինը: 1945 թ-ի մայիսի 8-ին գերագույն գլխավոր հրամանատարության անունից Ժուկովը ստորագրել է ֆաշիստական Գերմանիայի անվերապահ կապիտուլյացիայի ակտը, նույն թվականի հունիսի 24-ին Մոսկվայի Կարմիր հրապարակում ընդունել է հաղթանակի զորահանդեսը: 1945–46 թթ-ին Ժուկովը եղել է Գերմանիայում խորհրդային զորախմբերի հրամանատար և խորհրդային կառավարչության գլխավոր պետ, 1946 թ-ի մարտից՝ ցամաքային զորքերի գլխավոր հրամանատար և ԽՍՀՄ զինված ուժերի փոխնախարար: 1946– 1953 թթ-ին եղել է Օդեսայի և Ուրալի ռազմական օկրուգների հրամանատար, 1953 թ-ից` ԽՍՀՄ պաշտպանության նախարարի 1-ին տեղակալ, 1955 թ-ից՝ պաշտպանության նախարար: 1957 թ-ի հոկտեմբերին ազատվել է պաշտոնից, 1958 թ-ին՝ ԽՍՀՄ զինված ուժերից: Գեորգի Ժուկովը գրել է «Հիշողություններ և խորհրդածություններ» (1969 թ.) գիրքը, որը թարգմանվել է նաև հայերեն (1978 թ.): Գիրքը (3 հատորով) հեղինակի ձեռագրերի հավելումներով վերահրատարակվել է 1990 թ-ին, Մոսկվայում: Ժուկովի անունով են կոչվել ծննդավայրը, Կալուգայի մարզի Ուգոդսկո-Զավոդսկոյ շրջանը, Հակաօդային պաշտպանության ռազմահրամանատարական ակադեմիան, փողոցներ՝ Մոսկվայում և Սանկտ Պետերբուրգում:
| 
