«Կանչը» մանկապատանեկան եռօրյա թերթ է: Լույս է տեսնում 1925 թ-ից Երևանում (1941–45 թթ-ին ընդհատվել է): Մինչև 1990 թ. կոչվել է «Պիոներ կանչ»:
«Կանչը» պատանի ընթերցողներին դաստիարակում է հայրենասիրության ոգով, սերմանում ընկերասիրություն, քաջություն, ազնվություն, աշխատասիրություն, ծանոթացնում ազգային ավանդներին ու համամարդկային նվաճումներին: Մեծ տեղ է հատկացնում պատմության առանձին խնդիրների լուսաբանմանը, ազգային, պետական ու մշակութային արժեքների վերհանմանն ու վերագնահատմանը: Սկզբնական շրջանում թերթը մեծապես նպաստել է անգրագիտության վերացմանը: Թերթի խմբագրությունում երկար տարիներ գործել է բնության պահպանության շտաբ, որը ղեկավարել է գրող Վախթանգ Անանյանը: «Կանչի» կոչով Հայաստանում տնկվել են ծառեր, ստեղծվել զբոսայգիներ ու պուրակներ, ծառուղիներով միմյանց են կապվել բնակավայրեր: Արցախյան շարժման տարիներին թերթը ներկայացրել է իրադրությունն Արցախում: «Կանչի» նախաձեռնությամբ առաջին անգամ լույս է ընծայվել Արցախի պատանի ստեղծագործողների «Ձնծաղիկներ» ժողովածուն: «Կանչն» անդրադառնում է երկրում տեղի ունեցող կարևոր իրադարձություններին, գիտության ու մշակույթի, մարզական նորություններին, մեծ ուշադրություն է դարձնում նաև սփյուռքահայ կյանքի լուսաբանմանը: «Կանչը» նպաստել է հայ մանկական գրականության զարգացմանը: Տարիներ ի վեր թերթին առընթեր գործում են պատանի լրագրողների դպրոցը՝ «Շավիղ» պատանեկան խմբագրությունը, և պատանի ստեղծագործողների գրական ստուդիան: Իրենց ստեղծագործական առաջին քայլերը թերթում են արել անվանի գրողներ Սիլվա Կապուտիկյանը, Վահագն Դավթյանը, Հրաչյա Հովհաննիսյանը և ուրիշներ:
| 
