Փողաշուշանը (կալա, ռիխարդիա) նվիկազգիների ընտանիքի բազմամյա պալարավոր խոտաբույս է: Տարածված է Եվրասիայի, Հյուսիսային Ամերիկայի և Աֆրիկայի բարեխառն ու մերձարևադարձային շրջաններում: Որոշ տեսակներ ճահճային բույսեր են: ՀՀ-ում ջերմատնային պայմաններում մշակվում է ճահճային փողաշուշանը:
Տերևներն արմատամերձ են, երկարակոթուն, սրտաձև, փայլուն կանաչ: Ծաղկաբույլը կողր է՝ կազմված բազմաթիվ մանր, սպիտակ, դեղին, երբեմն՝ բաց դեղնավունից կարմրավուն ծաղիկներից: Ծաղկի ծածկող տերևիկը կամ թիկնոցը ձագարաձև է՝ ծայրին փոքրիկ ելուստով: Պտուղը հյութալի, կարմիր հատապտուղ է: Սողացող կոճղարմատները մեծ քանակությամբ օսլա են պարունակում:
Խիստ խոնավասեր է, պահանջում է առատ ոռոգում: Բազմանում է պալարներով, թփերի բաժանումով և սերմերով: Գեղազարդիչ է:
