Սաուդյան Արաբիա պետությունը Հարավարևմտյան Ասիայի ամենամեծ երկիրն է: Զբաղեցնում է Արաբական թերակղզու 2/3-ը և մի շարք կղզիներ Պարսից ծոցում և Կարմիր ծովում: Տարածքի մեծ մասը կազմում են մեղմաթեք հարթավայրերը, քարային և ավազային անապատները` Նեֆուդ, Դեհնա, Ռուբ էլ Խալի: Կարմիր ծովի ափին զուգահեռ ձգվում են Հիջազ և Ասիր լեռնաշղթաները, որոնք աստիճանաբար իջնում են դեպի առափնյա նեղ դաշտավայրը: Երկրի գլխավոր հարստությունը նավթն ու գազն են, որոնք կազմում են համաշխարհային պաշարների համապատասխանաբար՝ 30,8 և 4,5%-ը: Կան նաև երկաթի, քրոմի, պղնձի, կապարի, ցինկի, ոսկու հանքավայրեր: Բուսականությունը հիմնականում անապատային և կիսաանապատային է: Կենդանիներից հանդիպում են գայլը, բորենին, օնագր վայրի էշը և այլն: Շատ են կրծողներն ու սողունները: Կլիման հյուսիսում մերձարևադարձային է, հարավում՝ արևադարձային, խիստ ցամաքային: Մշտական հոսք ունեցող գետեր չկան: Սաուդյան Արաբիայի տարածքում հնագույն ժամանակներից բնակվել են տարբեր ժողովուրդներ ու ցեղեր: Մ.թ.ա. II հազարամյակում գերակշռել են արաբական քոչվոր ցեղերը: Սաուդյան Արաբիայի Հիջազ նահանգում VII դարում Մուհամեդի գլխավորությամբ ձևավորվել է մահմեդականությունը, և 630 թ-ին ստեղծվել է առաջին մահմեդական կրոնապետությունը՝ Արաբական խալիֆությունը՝ Մեդինա մայրաքաղաքով: 630–631 թթ-ին Մուհամեդը եղել է այդ կրոնապետության առաջին ղեկավարը, հետագայում նրան երկըրպագեցին որպես մարգարեի և «Ալլահի պատգամաբերի»: Հիջազում են գտնվում մահմեդականների սրբավայրերը՝ Մեքքան (Մուհամեդի ծննդավայրը) և Մեդինան (Մուհամեդի թաղման վայրը): Այդ պատճառով երկիրը կոչվում է նաև «Երկու մզկիթների երկիր»: Այս քաղաքների տնտեսական կյանքում կարևորագույն տեղ են գրավում ուխտագնացությունից ստացված եկամուտները: XIX դարի վերջում Արաբիայի մեծ մասը վահաբականների ջանքերով միավորվել է Սաուդյանների պետության մեջ: Արաբական տարածքների հետագա միավորման համար Իբն Սաուդի վարած պատերազմների արդյունքում՝ 1927 թ. ստեղծվել են Հիջազ պետությունը, Նեջը և միացյալ մարզերը, որոնք 1932 թ-ին միավորվել են Սաուդյան Արաբիա պետության մեջ: Երկրի բնակչության 80%-ից ավելին արաբներ են, որոնց գերակշիռ մասը քոչվոր
և կիսաքոչվոր կյանք է վարում: Ճնշող մեծամասնությունն անգրագետ է: Դպրոց չեն հաճախում քոչվորների երեխաները և աղջիկների զգալի մասը (տղաների և
աղջիկների ուսուցումն առանձին է): Խոշոր քաղաքներն են Էր Ռիյադը, Ջիդդանը, Մեքքան և Մեդինան, գլխավոր ծովային նավահանգիստները` Պարսից ծոցում՝ Դամամը, Ջուբայլը, Հաֆջին, Կարմիր ծովում՝ Ջիդդան, Յանբուն և Ջիզանը: Տնտեսության գլխավոր ճյուղը նավթարդյունաբերությունն է: Նավթի հանույթով (350–450 մլն տ) երկիրն աշխարհում երրորդ տեղում է՝ Ռուսաստանից և ԱՄՆ-ից հետո, իսկ գազի հանույթով մտնում է առաջին տասնյակի մեջ: Կան պարարտանյութերի, մետաղաձուլական, սննդի, քսայուղերի արտադրության ձեռնարկություններ: Գյուղատնտեսության զարգացման հնարավորությունները հսկայածավալ տարածքի վրա խիստ սահմանափակ են: Դա հնարավոր է միայն օազիսներում: Կարևոր մշակաբույսը փյունիկյան արմավենին է: Մշակում են նաև ցորեն, սորգո, կորեկ, եգիպտացորեն, բանջարեղեն: Բուծում են խոշոր ու մանր եղջերավոր կենդանիներ, ուղտեր, զբաղվում են ձկնորսությամբ:
|
