Սենտ Լյուսիան պետություն է Կարիբյան ծովի համանուն կղզում՝ Փոքր Անտիլյան կղզիների հարավ-արևելքում: Բրիտանական համագործակցության անդամ է:
Հրաբխային ծագման կղզի է, ունի լեռնային մակերևույթ: Ամենաբարձր կետը 950 մ է: Կլիման արևադարձային է: Կան կարճ գետակներ, լեռնալանջերին՝ մշտադալար անտառներ:
Կղզին հայտնաբերել է Ք. Կոլումբոսը 1502 թ-ին: 1814 թ-ից եղել է Մեծ Բրիտանիայի տարածք, 1967 թ-ին ստացել է Մեծ Բրիտանիային միավորված պետության կարգավիճակ, իսկ 1979 թ-ի փետրվարին ձեռք է բերել անկախություն:
Տնտեսության հիմքը գյուղատնտեսությունն ու զբոսաշրջությունն են: Մշակում են ցիտրուսներ, շաքարեղեգ, կակաո, մանգո, կոկոսյան արմավենի, ադամաթուզ: Զբաղվում են նաև անասնապահությամբ և ձկնորսությամբ: Կան գյուղատնտեսական հումքի վերամշակման ձեռնարկություններ:
