Վագերաձիերը (զեբրեր) միասմբակավորների կարգի ձիերի սեռի կաթնասուններ են: Ըստ մեծության, գանգի կառուցվածքի և շերտավորության՝ տարբերում են 3 տեսակ: Տարածված են Արևելյան, Կենտրոնական և Հարավային Աֆրիկայում: Բնակվում են անապատներում, տափաստաններում, անտառատափաստաններում:
Մարմնի երկարությունը 200–240 սմ է, պոչինը՝ 45–57 սմ, մնդավի բարձրությունը՝ 120–140սմ, կենդանի զանգվածը՝ մինչև 350 կգ: Մարմինըծածկված է կարճ ու կոպիտ բրդով՝ մեկընդմեջ մուգ ու բաց գույնի շերտերով: Յուրաքանչյուր անհատի նախշն անկրկնելի է: Պոչն ավարտվում է երկար մազափնջով: Հանդիպում են հոտերով, հաճախ՝ այծքաղների հետ: Չնայած շատ զգույշ ու արագավազ կենդանիներ են, սակայն հաճախ առյուծների, հովազների ու բորենիների որս են դառնում: Սնվում են բուսական կերով: Ծնում են 1–2 ձագ: Արհեստական պայմաններում լավ են բազմանում:
Որսում են գեղեցիկ մորթու և համեղ մսի համար: Թվաքանակի նվազման պատճառով վագերաձիերն առնված են պաշտպանության ներքո:
