Ամերիգո Վեսպուչին այն բացառիկ հաջողակ ծովագնացներից է, ում անունով է կոչվել, ըստ էության, իրենից առաջ հայտնաբերված Ամերիկա մայրցամաքը:
Ամերիգո Վեսպուչին որպես ծովային ծառայել է Իսպանիայում, Պորտուգալիայում: 1499–1504 թթ-ին մասնակցել է մի քանի արշավախմբերի՝ դեպի Հարավային Ամերիկայի հյուսիսային ափերը: Այդ մայրցամաքի հյուսիսային և արևելյան ափերով նավարկելիս նա, հակառակ Կոլումբոսի, հանգել է այն եզրակացության, որ այն նորահայտ աշխարհ է, և անվանել է Նոր Աշխարհ: Վեսպուչին իր ճանապարհորդությունների մասին հաղորդել է նամակներով, որոնք այդ ժամանակաշրջանում մեծ համբավ էին վայելում և բազմիցս վերահրատարակվել են:
Լոթարինգիացի քարտեզագիր Մ. Վալձեմյուլլերը Ք. Կոլումբոսի Հարավային Ամերիկայի երկրների հայտնագործությունները վերագրել է Վեսպուչիին և, ի պատիվ նրա, առաջարկել մայրցամաքն անվանել Ամերիկա: 1538 թ-ին ֆլամանդական քարտեզագիր Մերկատորն իր քարտեզի վրա առաջին անգամ այդպես է անվանել նաև Հյուսիսային Ամերիկան:
