Ջիբութին պետություն է Աֆրիկայի հյուսիս-արևելքում` Բաբ էլ Մանդեբի նեղուցի և Ադենի ծոցի ափին: Երկրի մակերևույթը գերազանցապես լեռնային է: Խոր իջվածքները հաճախ փոխարինվում են ուղղաձիգ բարձրություններով ու լեռնաշղթաներով: Կլիման շոգ է, չոր: Մշտական հոսք ունեցող գետեր չկան: Խոշոր լճերից են Ասալը և Աբեն: Տարածված են կիսաանապատները:
Երկիրը եղել է ֆրանսիական գաղութ: 1967 թ-ի մարտին հայտարարվել է ինքնավար՝ Աֆարների և իսաների ֆրանսիական տարածք անվամբ: 1977 թ-ի հունիսի 27-ին Ջիբութին հռչակվել է անկախ պետություն:
Երկրում բնակվում են աֆարներ, իսաներ, կտարներ և այլք: Բնակչության հիմնական զբաղմունքը քոչվոր և կիսաքոչվոր անասնապահությունն է: Զբաղվում են նաև ձկնորսությամբ, մարգարտի արդյունահանությամբ: Կան նավաշինական, սննդի արդյունաբերության ձեռնարկություններ:
