Ագաթը միներալ է, նուրբ շերտավոր քաղկեդոնի տեսակ: Լինում է տարբեր գույների և երանգների զուգահեռ նուրբ գծաշերտերով, նախշերով ու ցանցով, գետաքարերի, խողովակաձև մարմինների երակների ձևով: Կարծրությունը միներոլոգիական սանդղակով 6–6,5 է: Առաջանում է հրաբխային ապարներում: Կիսաթանկարժեք քար է, օգտագործվում է տեխնիկայում և ակնագործության մեջ:
Հայաստանում հայտնի է Սարիգյուղի ագաթի հանքավայրը: Արտաշատ, Կարմիր բլուր, Լճաշեն և այլ հնավայրերից հայտնաբերվել են մ.թ.ա. III–I հազարամյակներին վերագրվող ագաթե զարդեր:
