Բաոբաբն աճում է Աֆրիկայում, Մադագասկարում և Հյուսիսային Ավստրալիայում. ապրում է 4–5 հզ. տարի: Բնի շրջագիծը 25 մ է, բարձրությունը՝ 18–25 մ: Բաոբաբի տերևները մատնաձև են, ծաղիկները` խոշոր ու սպիտակ, պտուղները՝ երկար, վարունգանման, հյութալի, քաղցրահամ միջուկով, որը կարելի է ուտել: Բաոբաբը տերևաթափ է լինում ոչ թե ձմռանը, այլ ամռանը: Նրա տերևները խոնավություն են գոլորշիացնում, և որպեսզի ծառը քիչ խոնավություն կորցնի, տերևաթափ է լինում շոգ եղանակին, իսկ ձմռանը նորից ծածկվում է տերևներով ու ծաղիկներով:
Ծառը չի այրվում, որովհետև նրա բնափայտը հագեցած է ջրով: Աֆրիկացիներն ասում են. «Բաոբաբը մեծ է, բայց նրանից փոքրիկ խարույկ անգամ չես վառի»:
Բաոբաբի կեղևից ստացվող թելն օգտագործվում է կոպիտ գործվածքներ և պարաններ պատրաստելու համար:
