Բանաստեղծ, դրամատուրգ, թարգմանիչ, Նոբելյան մրցանակի դափնեկիր, ազգությամբ հրեա Իոսիֆ Բրոդսկին իր ստեղծագործությամբ ռուս գրականությունը հարստացրել է նոր լեզվամտածողությամբ:
Իոսիֆ Բրոդսկին մանկությությունն անցկացրել է պաշարված Լենինգրադում: Ցուրտ ու սոված տարիների տպավորությունները նրա ստեղծագործությունների հիմնական թեմաներից են: Ընտանիքին օգնելու համար 16 տարեկանից աշխատել է. եղել է բանվոր, բուժակ, հնոցապան, նավաստի, մասնակցել աշխարհագրական գիտարշավների: Ուսման պակասը լրացրել է ընթերցանությամբ, հրապուրվել փիլիսոփայական-հոգևոր գրականությամբ, ինքնուրույն սովորել է անգլերեն և լեհերեն: Բրոդսկին ստեղծագործել է 18 տարեկանից: Նրա ստեղծագործությունները հիմնականում նվիրված են մարդու հոգևոր ազատությանը, վեհ ու գեղեցիկ գաղափարների պայքարին, հավերժական ազատատենչությանը: Նրա «Հուշարձան Պուշկինին», «Դիլիգրիմներ», «Ծննդյան ռոմանս», «Ծայրամասից դեպի կենտրոն», «Ես որդին եմ արվարձանների...» և այլ բանաստեղծությունների բնորոշ են վառ արտահայտված նոր ռիթմերը, երաժշտականությունը: Բրոդսկու սիրային բանաստեղծությունները («Ես գրկեցի այս ուսերը...», «Ո՜չ տրտմություն, ո՜չ սեր, ո՜չ թախիծ...», «Հանելուկ հրեշտակին») նվիրված են երջանկության գաղտնիքներին ու առեղծվածներին: 1964 թ-ին Բրոդսկին ձերբակալվել է պորտաբուծության մեղադրանքով և աքսորվել Արխանգելսկի մարզի Նորենսկայա գյուղ, ինչը հարուցել է աշխարհի առաջադեմ մտավորականության զայրույթն ու բողոքը: 1965 թ-ին Նյու Յորքում լույս է տեսել նրա բանաստեղծությունների և դատավարության սղագրությունների ժողովածուն («Օդային ուղիներ - IV»): 1972 թ-ին նա արտաքսվել է ծննդավայրից: Տարագրության շրջանում եղել է Միչիգանի համալսարանի պրոֆեսոր. դասավանդել է ռուս գրականության պատմություն և XX դարի պոեզիա, աշխատել է նաև Նյու Յորքի Կոլումբիայի համալսարանում և այլուր: 1986 թ-ից գրել է անգլերեն բանաստեղծություններ, էսսեներ. «Ավելի քիչ, քան մեկը» ժողովածուն 1986 թ-ին համարվել է ԱՄՆ-ի՝ Տարվա լավագույն գրական-քննադատական գիրքը: Կյանքի վերջին շրջանի բանաստեղծություններն ու էսսեները նվիրված են ծնողներին («Հորս հիշատակին...», «Մտածմունքս քո մասին հեռանում է, ինչպես աշխատանքից զրկված ծառան...», «Մեկուկես սենյակներ»): Բրոդսկու գործերը Ռուսաստանում տպագրվել են 1988 թ-ից: «Նամակ հրեշտակին», «Մենք ապրում էինք քաղաքում...» և այլ բանաստեղծություններում գերիշխում են հայրենաբաղձության և վերադարձի թեմաները: Բրոդսկին լույս է ընծայել «Կանգառ անապատում» (1970 թ.), «Անգլիայում» (1977 թ.), «Հռոմեական էլեգիաներ» (1982 թ.), «Ճանապարհորդություն դեպի Ստամբուլ» (1985 թ.), «Գեղեցիկ դարաշրջանի վերջը (1989 թ.), «Բնանկար հեղեղումներով» (1996 թ.) գրքերը:
| 
