Գամբիան գտնվում է Արևմտյան Աֆրիկայում՝ Գամբիա գետի ստորին հոսանքի ավազանում: Արևմուտքից ողողվում է Ատլանտյան օվկիանոսի ջրերով: Բրիտանական համագործակցության անդամ է:
Երկրի մակերևույթը հարթավայրային է՝ մասնատված Գամբիա գետի վտակներով: Կլիման հասարակածային է: Տարածված են սավաննաները, գետահովիտներում՝ մշտադալար անտառները:
Գամբիան XIX դարի սկզբից եղել է Մեծ Բրիտանիայի գաղութը: Անկախություն է ձեռք բերել 1965 թ-ի փետրվարին:
Երկրում բնակվում են աֆրիկյան տարբեր ժողովուրդներ՝ մանդինգոներ, ֆուլբեներ, վոլոֆներ և այլք:
Գյուղատնտեսական երկիր է: Մշակում են գետնանուշ, բրինձ, կորեկ, սորգո, եգիպտացորեն և այլն: Զբաղվում են անասնապահությամբ և ձկնորսությամբ: Կան սննդի արդյունաբերության, փայտամշակման ձեռնարկություններ:
