Կերակուր պատրաստելիս, այգում աշխատելիս կամ ավտոմեքենա նորոգելիս մենք մշտապես օգտագործում ենք տարբեր գործիքներ: Գործիքն այս կամ այն աշխատանքը կատարելուն օգնող առարկա է: Ձեռնարկություններում մետաղները, փայտանյութը, պլաստիկները և այլ նյութեր կտրելու կամ մշակելու համար օգտագործում են խոշոր մեքենաներ:
Ձեռքի գործիքները գործածելու համար պահանջվում է մեր մկանների ուժը: Մեխանիկական գործիքները շարժման մեջ են դրվում էլեկտրականությամբ կամ սեղմած օդով: Հատուկ էլեկտրական գործիքները՝ էլեկտրապտուտակիչը, էլեկտրագայլիկոնիչը, էլեկտրասղոցը և հետհար մուրճը աշխատում են էլեկտրացանցի, կամ լիցքավորվող կուտակիչների ու մարտկոցների հոսանքով: Օժանդակ գործիքները կարող են ձեռքի էլեկտրագայլիկոնիչը փոխարկել մեքենայական մետաղասղոցի, սկավառակասղոցի կամ ավազաշիթի ապարատի:
Մեքենայական գործիքներն ավելի հզոր են և շատ ավելի արագ ու ճշգրիտ են աշխատում, քան ձեռքինը: Այսօր բազմաթիվ մեքենայական հաստոցներ ղեկավարվում են համակարգիչներով: Այդ հաստոցներով կարելի է թողարկել բազմաթիվ բացարձակապես նույնատիպ մեքենամասեր:
Մասնագիտացված հաստոցների թվին են պատկանում խառատային, հղկման, երկայնական ու լայնական ռանդման, գայլիկոնիչ և ֆրեզային հաստոցները:
