Գրենադան գտնվում է Կարիբյան ծովի հարավ-արևելքում՝ Փոքր Անտիլյան կղզեխմբի Գրենադա և հարակից կղզիների վրա: Բրիտանական համագործակցության անդամ է:
Գրենադա կղզին ունի հրաբխային ծագում, առավելագույն բարձրությունը 840 մ է: Կլիման մերձհասարակածային է: Ընդարձակ տարածքներ են զբաղեցնում մշտադալար անտառները:
Կղզին հայտնագործել է Ք. Կոլումբոսը 1498 թ-ին: Այնուհետև կղզում տիրապետություն հաստատելու համար պայքարել են Մեծ Բրիտանիան և Ֆրանսիան: 1783 թ-ից եղել է Մեծ Բրիտանիայի գաղութ, 1967 թ-ից ստացել է «Մեծ Բրիտանիային միավորված պետություն» կարգավիճակ: Անկախություն է ձեռք բերել 1974 թ-ին:
Երկրի տնտեսության հիմքը գյուղատնտեսությունն է: Մշակում են մշկընկույզ (տալիս է համաշխարհային արտադրության 1/3-ը), կակաո, շաքարեղեգ, ադամաթուզ, ծխախոտ և այլն: Կան ծխախոտի, ալկոհոլային և ոչ ալկոհոլային խմիչքների արտադրության ձեռնարկություններ:
