Գվինեա Բիսաուի Հանրապետություն Գվինեա Բիսաուն գտնվում է Արևմտյան Աֆրիկայում՝ Ատլանտյան օվկիանոսի ափին: Կազմված է մայրցամաքային մասից, Բոլամա կղզուց և Բիժագոշ կղզեխմբից (շուրջ 60 կղզի): Երկրի մակերևույթն առավելապես հարթավայրային է, տեղ-տեղ՝ ճահճոտ: Կլիման մերձհասարակածային է: Գետերը (Կորուբալ, Ժեբա, Կաշեու) կարճ են, բայց ջրառատ: Ընդարձակ տարածություններ են զբաղեցնում մշտադալար անտառներն ու սավաննաները: XV դարից Գվինեա Բիսաուի տարածք են թափանցել պորտուգալացիներ, գաղութացրել են այն և վերածել ստրուկների վաճառահանման կետի: Երկիրն անկախություն է ձեռք բերել 1973 թ-ին: Պետության կրկնակի անվանումը (երկրի Գվինեա և մայրաքաղաքի Բիսաու անուններով) Ֆրանսիական Գվինեա գաղութի տեղում ստեղծված Գվինեա պետությունից տարբերելու նպատակով է տրվել: Երկրի տնտեսության հիմքը գյուղատնտեսությունն է: Մշակում են գետնանուշ, բրինձ, բամբակենի, կաուչուկատուներ, կակաո, շաքարեղեգ: Կան գյուղատնտեսական հումքի վերամշակման, թաղանթանյութի, փայտամշակման, խեցեգործական ձեռնարկություններ:
|
